يمكنك الكتابة معنا بالموقع
الكتابة بحرية تامة
سجل حسابك بالموقع الان انه مجاني

من فوائد نوم الرجل وهو يحتضن مخدته !

2020-08-01 10:02:26 شعر و أدب ...






حكى لنا حنفي بن تامر وقال :
جاني راجل كهل , شكله مكّار مش سهل , جاني عشان يستشير , ويسأل حضرتي , وياخُد من خبرتي , ومن علمي الغزير , ..رَحّبت بحضّرتُه , وسمعت شَكّوتُه .
الرجل الكهل : أنا مشكلتي إني دايماً بأنام وأنا حاضن المخدة
حنفي : يعني بتسيب مراتك لوحدها وتُحضن المِخَدّة ؟!
الرجل الكهل : لأ ...أنا مش متجوّز ...أنا عندي 45 سنة ولِسّه ما أتجوّزتش
حنفي : مش مُهِم أكم مشاهير ومغامير ما إتجوّزوش وعاشوا مرتاحين عادي , وأكم ناس إتجوّزوا أكتر من مرّة وإكتشفوا في الآخر إن حياة العذوبية أحسن ألف مرة من حياة الزوجية
الرجل الكهل : أنا بس اللي قاهرني إن كل مشاعري بتطلع في المخدة ...مش قادر أصبر على حياة العزوبية خلاص
حنفي : عندك عروسة ؟!
الرجل الكهل : لأ لأ
حنفي : عندك عفش ؟!
الرجل الكهل : لأ لأ
حنفي : عندك شقة ؟
الرجل الكهل : لأ لأ
حنفي : عندك حق المهر والشبكة والفرح والجاتوه ؟
الرجل الكهل ( بغضب ) : لأ لأ لأ لأ لأ
حنفي : طيب ذنبها أيه اللي هتتجوّزها تعيش أسوأ أيام حياتها مع راجل فقير زَيّك ؟....سيبها يا أخي جايز ربّنا يكرمها بحد أحسن منك
الرجل الكهل : طب ما جايز ربنا يكرم بعد كدة ..ربّنا هوّا الرزّاق يا أخي
حنفي : ونعم بالله ...رَبّنا بَرّضُه هوّا اللي قال يا مؤمن :
" إعقلها وتوكّل "
ولازم تاخُد بالك كويس إن الأسعار بتغّلى ...وكل شيء بقا غالي جداً جداً..والفلوس قيمتها بتقل ..والمصايب كتير ....والحوادث أكتر ...والأمراض يامة....والناس بتنتحر من سوء الظروف وصعوبة المعيشة
الرجل الكهل ( بغضب ) : خلاص يا عم حَسّرتني على نفسي ...العزوبية دي ...
حنفي : العزوبية دي نعمة ما يحسّش بيها إلّا واحد الجواز بهّدله ووقّف له حياته...ودول دلوقتي كتير جداً
الرجل الكهل ( بحيرة ) : بس الناس بتتكلّم وتقول ...
حنفي : يا حبيبي إحنا شعب فاضي ومش بينتج فالناس مش هتبطّل كلام عليك ...لو ما إتجوزتش هيقولوا ما إتجوّزتش ليه لحد دلوقتي؟ ..إتجوّزت هيقولوا إتجوّزت مين ؟ وإمتى ؟ وليه ؟ وعرفتها منين ؟ كان جواز صالونات وألا عن حب ؟ ولو عن حُب حبّيتها إزّاي ؟..وفين ؟ ..وإمتى ..وإشمعنا ؟...ولو عدّت عليك سنة من الجواز هيقولوا لك الناس ما فيش حاجة جاية في السكة ؟ مراتك حامل وألّا لِسّه ؟ طب إتأخّرت في الحمل ليه ؟ طب ما تروح تكشف إنتَ وهيّ , ولو خلّفت هيسألوك إنتَ جبت أيه ولد وألّا بنت ؟ طب سمّيت المولود أيه ؟ طب الإسم دا ليه ؟ ومين إختار الإسم دا ؟ طب ما سمّيتوش الإسم الفلاني ليه ؟
الرجل الكهل ( بحيرة ) : خلاص ياعم ...هِيّا الناس كمان بتقول لي إتجوّز عشان تلحق تخلّف لك عيل وإنّتَ شاب
حنفي : يا عالم جايز يطلع عندك عُقّم وما تخلّفش أًصلاً , وجايز تخلّف عيل وتطلق أمّه , والعيّل دا يصيع ويتشرّد بسببك , جايز العيل دا يموت في حادثة أو بسبب مرض قاتل ويحسّرك عليه طول عمرك , جايز العيّل دا يطلع حرامي وفاسد ويشوّه سُمعتك ويبدّد فلوسك ويهد اللي طول عمرك إنت بتعمله ربنا بيقول عن الطفل الفاسد اللي قتله سيدنا الخضر :
" فَانطَلَقَا حَتَّى إِذَا لَقِيَا غُلَاماً فَقَتَلَهُ قَالَ أَقَتَلْتَ نَفْساً زَكِيَّةً بِغَيْرِ نَفْسٍ لَّقَدْ جِئْتَ شَيْئاً نُّكْراً "
وبعد كدة شرح لنا سيدنا الخضر السبب وقال :
" وأمَّا الْغُلَامُ فَكَانَ أَبَوَاهُ مُؤْمِنَيْنِ فَخَشِينَا أَن يُرْهِقَهُمَا طُغْيَاناً وَكُفْراً "
وربنا كمان قال عن إبن سيدنا نوح الفاسد :
" وَنَادَى نُوحٌ رَّبَّهُ فَقَالَ رَبِّ إِنَّ ابُنِي مِنْ أَهْلِي وَإِنَّ وَعْدَكَ الْحَقُّ وَأَنتَ أَحْكَمُ الْحَاكِمِينَ ..قَالَ يَا نُوحُ إِنَّهُ لَيْسَ مِنْ أَهْلِكَ إِنَّهُ عَمَلٌ غَيْرُ صَالِحٍ فَلاَ تَسْأَلْنِ مَا لَيْسَ لَكَ بِهِ عِلْمٌ إِنِّي أَعِظُكَ أَن تَكُونَ مِنَ الْجَاهِلِينَ "
الرجل الكهل ( بحيرة ) : صدق الله العظيم
حنفي : لو هتتجوّز عشان تخلّف بلاها خِلفة وممكن تتبنى لك عيّل أحسن
الرجل الكهل ( بحيرة ) : أنا عاوز زوجة بدل المخدّة !
حنفي : ياعم جايز تتجوّز واحدة وتلاقي شخصيتها إتغَيّرت بعد الجواز تماماً ودا بيحصل كتير , وممكن كمان الواحدة تمرض مرض خطير أو تموت أو تزهّقك في عيشتك بالنكد أو تمرّمَطك في المحاكم عشان تطلّقك أو تخلعك أو تاخُد مِنك عيالك أو تسرقك وتنهب مُمتلكاتك وخصوصاً الشقة والعفش أو تجيب لك الفضيحة والعار بسبب سلوكياتها الشمال أو تتفق مع عشيقها عشان يقتلوك هيّ وهوّا .
الرجل الكهل ( بغضب ) : يا ساتر يا رب خلاص ياعم مش عاوز كدة المخدة أحسن
حنفي : بالظبط كدة ....المخدة لما تُحضنها هتلاقيها ناعمة أوي ..وطرية أوي ...وحنينة أوي ....المخدة مش هتاخُد لها برشام قبل ما تحضنها إلا لو كان عندك صُداع ...المخدة مش هتقول لك إنتَ النهاردة تعبان وإنبارح كنت نص حصان والأسبوع اللي فات كُنت حصان ...المخدة مش هتصدّع دماغك بالكلام قبل النوم ...المخدّة مش هتفشي أسرار أوضة النوم لصاحباتها وللناس ...المِخدّة مش هتبقى عرقانة ولا ريحتها طبيخ ولا ريحة بقها وحشة ولازقة فيك ....المخدة مش هتخلف لك فوطة صغيرة والفوطة دي تصدّعك والمخدة تقول لك قوم شوف بنتك عملت أيه؟ ...المخدة مش هتصحّيك من النوم ...بالعكس هتفضل حاضناك طول ما إنتَ حاضنها ...ومش هتعيط ولا تزعل ولا تتقمص لما تسيبها وتقوم من جمبها ....ولا حتزعل حتى لما تزُقّها برجلك وتوقّعها من فوق السرير ...المخدة مش هتقول لك أنا عيّانة قوم وديني عند الدكتور ...ولا هتضيع لك حاجاتك ولا هتفتش في هدومك ومحفظتك ...المخدة مش هتصوّت لما تلاقيك تعبان ومش قادر تقوم من السرير ....المخدة مش هتقول لك طلّقني ولا هتكلّم لك أبوها وخالها عشان يجوا يقعدوا معاك في قعدة عرفية عشان يحلّوا المشاكل اللي بينك وبين المخدّة ...المخدة مش هتاخد منك حق القايمة ومؤخر صداق وترفع عليك قضايا لما تطلقها...والأهم من دا كُله..لما يرن تليفونك ويطلع المتصل صوت حريمي ...المخدة مش هتقول لك مين اللي كنت بتكلمها دي يا بيه ؟!!
الرجل الكهل ( مُبتسماً ) : روح يا شيخ الله يصلح حالك ...إنتَ حلّيت لي مُشكلة جامدة جداً
حنفي : وأزيدك من الشعر بيت ....حتى لو إنتَ متجوّز هتسيب مراتك وتُحضن المخدة برضة زي ما رجالة يامة أوي بيعملوا الأيام دي
الرجل الكهل ( ضاحكاً ) : هههههه هيبقى زوجة ومخدة ؟!! على أيه بقا كفاية أوي المخدة عليّا ....بعد إذنك بقا يادوب ألّحق أروّح عشان أنام لي شويّة وأنا حاضن المِخدة حبيبتي .
حنفي : عين العقل ....ربنا يجمع بينكم على خير يارب ..وما يحرمك منها أبداً يا رب
قال حنفي بن تامر : وسابني ومشى بقوّة , وحماس جامد وهوّا , مبسوط زي الأفندي , علشان أنا جاوبّتُه , ولقى حل لمشكلته , النفسية عندي , في حد الزمان دا , عاقل يسيب المخدّة , ويروح يتجوّز واحدة , تِتّك على عيوبه , وتفلّس له جيوبه ,..أنا إحصائي ميداني , وأخصّائي نفساني , ياه لو كنت دخلت , طِب بيطري وفشلت , من سنة أولى كان زماني , فاتح مركز طِبي , على الطُراز الأوروبي , شغّال صحة نفسية , على إرشادات أُسرية , على تعديلات سلوكية , على تنمية البشرية , وممكن بعد وقت , أكون كمان إفتتحت , أكتر من فرع ليّا , فرع في إسكندرية , والتاني فـ المريوطية ...والختام



















نحن نقدر تعاونك
من فضلك اختر نوع التجاوز




شاهد ايضا




التعليقات

  • اكتب تعليق




مواضيع جديده



افضل 30 كاتب هذا الاسبوع

اكثر المواضيع مشاهدة علي الاطلاق