يمكنك الكتابة معنا بالموقع
الكتابة بحرية تامة
سجل حسابك بالموقع الان انه مجاني

انا والحامل وهواك

2020-07-28 22:20:57 حواء ...






أنا عارفة انت عايزنى أموت وانا بولد علشان تخلص منى.... 

الجملة دى خلاص اتعودت عليها واتعودت انى لازم اسمعها بتتكرر كتير وخاصة فى أواخر شهور حمل زوجتى...فى اى موقف يحصل واى قفشة حتى لو خفيفة بيننا،،، والرد عليها بديهى واى مواطن مصرى أصيل عايز يخلص من وصلة نكد خلاص على الأبواب لازم يرد الرد ده،،، 

بعد ما أضيق عنيا وأرفع حواجبي كناية عن المفاجأة اللى سببتها ليا الجملة مع انى سمعتها مليون مرة،، بقولها بصوت أجش حزين : أنا يا روحى عايز أخلص منك؟؟ طيب يارب انا وانتى لأ..... بحس ساعتها انى فاجأتها باجابتى وانها خلاص بتستعد لأنها تعوضنى عن وصلة النكد اللى كانت على وشك بدأها وخلاص هتعملى موافقة على تغيير أوردر النكد والعكننة بأوردر تانى مكون من بعض الحنية ومزيد من الطموحات والتطلعات البريئة والتى لا تخلو احيانا من الخيال العلمى... يعنى مثلا بعد ما نهدى ونقعد نتجاذب أطراف الحديث اللى أنا مش عايز أكمله علشان عارف أخره ايه... ونبدأ اول سؤال خيال علمى ومعانا سؤال من صديقة البرنامج الحامل مراتى بتسأل وتقول : هتحبنى انا اكتر ولا مصطفى؟؟ ( مصطفى ده اسم ابننا اللى لسه ما جاش)،، ياستى انتى مراتى وهو ابنى وماليش غيركم فى الدنيا مش طالبة أسئلة وجودية،،،، طيب عزيزى القاريء وعزيزتى القارئة تعالوا معايا اخدمك لسؤال خيال علمى تانى بيقول : ايه رأيك لو نجيب للواد خمس باكيتات بامبرز؟؟ ( قصدها قبل ما يتولد)،،،،،، خمس باكيتات بامبرز قبل ما يتولد.؟؟ ليه ده لو هيرضع بامبرز مش هنجيب له خمس علب بامبرز قبل ما يتولد،،،، اه يا زمن ده انا لو ابويا كان جايلى خمس باكيتات بامبرز قبل ما اتولد كنت طلعت طيار....

طيب خلصنا من فقرة الأسئلة الوجودية ندخل على فقرة خيالات زمن الحمل الجميل.... 

تبدأ البطلة فى النظر الى المراية وتنظر بتأمل إلى شكل بطنها وتنظر إلى البطل الغلبان مستنكرة وتقول : هو انا بطنى كبرت اوى صح؟؟ ياستى ما تكبر عادى هو انتى عندك انتفاخ،، ده انتى حامل.... بكلمات متحشرجة ترد لتقول : هانت.... 

ذات مومنت لما الشيطان يتغلب عليا ويقدر يوسوسلى انى اسهر مع اصحابى شوية عالقهوة واخلص السهرة وأرجع لقدرى المحتوم،،طبعا ارجع الاقي بوز مضروب كفيل انه يندمنى على اللى انا عملته ويخلينى أقرر افكر الف مرة قبل ما اعمله تانى،،، وطبعا الكلام اللى كلنا عارفينه زي الجملة التاريخية : ما تبات برة أحسن،،، أو الجملة ذات الأثر الملموس : ما لسه بدرى كأن يعنى مفيش واحدة فى البيت،،،، ومرة واحدة تخبطهالى فى وشي : لو زهقان منى اوى كده ممكن اروح اقعد عند ماما شوية،،، ابصلها واقولها وأهون عليكى تسيبسنى يا روحى.... طبعا بيبقي ساعتها فى دماغي مشهد محمد هنيدي لما كان بيقول " والله فراقك صعب يا ام يازيد وهو بيصقف ويغنى.... 

الخلاصة بقا والكلمتين اللى بجد.. فترة الحمل لها ما لها وعليها ما عليها فترة ملخبطة كلها مشاعر وأحاسيس متضاربة مش للست بس لكن للراجل كمان  بس لازم نعذر الست لأنها بجد بتبقي مرتبكة وخايفة من جواها حتى لو بينت عكس ده..... 

#يتبع


















نحن نقدر تعاونك
من فضلك اختر نوع التجاوز




شاهد ايضا




التعليقات

  • اكتب تعليق




مواضيع جديده



افضل 30 كاتب هذا الاسبوع

اكثر المواضيع مشاهدة علي الاطلاق