مراجعة فيلم " لص بغداد "

" لا يوجد حرق لأحداث الفيلم "

قصة الفيلم بتتكلم عن شاب اسمه يوسف ، و بيشتغل حرامى آثار مع واحد صاحبه اسمه مجدى ، و فى أحد مغامراته للبحث عن كنز الاسكندر الاكبر ، بيتعرف على بنت اسمها سلمى ، و الى هاتكون ثالثهم فى المغامرة ، و فى نفس الوقت بيكون فيه شخصين كمان بيدوروا على الكنز ، و بنتابع بعد كده احداث الفيلم و عملية البحث عن مفاتيحة و بتعرف مين الاشخاص الى بيدوروا على الكنز ، و ايه هوا دافع يوسف الرئيسى الى خلاه يدور على الكنز ...

مميزات الفيلم :

اول حاجة :

اداء ياسمين رئيس و فتحى عبد الوهاب ، المشاهد  الى اى واحد من الاتنين موجود فيه على الشاشة و خصوصا فى المشاهد الحوارية الكوميدية ، فالمشاهد دى كانت أكثر مشاهد فيها كوميدية حلوة فى الفيلم و نابعة من جوة الشخصية إلى بيجسدوها ، مش مجرد ايفهات دارجة فى السوشيال ميديا أو تكرار لأسلوب الوالد إلى بيبقى فى احيان كتيرة ممل .

ثانى حاجة :

مشاهد الأكشن كانت حلوة ؛ رغم أن لو هقارنها مثلا بأكشن فيلم ولاد رزق الجزء الثاني  و الاتقان إلى فيه مع شغل المؤثرات البصرية فالتفوق اكيد بالنسبالى هايروح لولاد رزق ، لكن هراعى برضه فكرة أن الحالة هنا مختلفة و ده فيلم مغامرة و حاجة جديدة فى شكلها على السينما المصرية .

ثالث حاجة :

شغل المؤثرات البصرية كان متقن و معمول كويس جدا لحد كبير ، برغم برضه أن الى قدمه الفيل الازرق الجزء الثانى و مطاردة العربيات فى ولاد رزق الجزء الثانى ، يخلونا لازم نحطهم كمقياس لأى عمل بيستخدم تقنيات كان فى فترة فاتت ممكن نقول عليها جديدة على السينما لكن فى اخر كام سنة بقى استخدامهم بشكل سنوى و لازم بيبقى فيه فيلم او  اتنين كل سنة بتكلفة و تقنيات عالية ، ففكرة انى اقول دى محاولة و جرأة اظن انها لازم تتلغى خلاص ، بقوا مستعدين يصرفوا كتير على الافلام ، فالمشاهد من حقه أنه يشوف احسن جودة للمنتج الى هايطلع .

عيوب الفيلم :

اول حاجة :

الكوميديا زى ما قولت غير مشاهد ياسمين رئيس أو فتحى عبد الوهاب ، كل الكوميديا بالنسبالى كانت عادية و احيانا غير فعالة خالص .

ثانى حاجة :

حسيت فى بعض الأوقات أن مخرج الفيلم " احمد خالد موسى " مش عارف يمسك الفيلم من النص  و يسطير عليه و يخلى ليه ايقاع و لون يعيش المشاهد فى أجواء المغامرة و الآثار و يخليه ديما حاسس و فاكر خط الأحداث الرئيسى ، و الى هوا عملية البحث عن كنز الاسكندر ، و ده مكنش موجود للاسف و فيه مشاهد كنت بحس إننا فى فيلم تانى و بنرجع بعد كده للفيلم الرئيسى بتاعنا ، و غير كده فيه حاجات كانت بتحصل ملهاش تفسير و لا معنى بس كانت بتعدى .

ثالث حاجة :

نهاية الفيلم مكنتش احسن حاجة بالنسبالى ، و كل محاولات الفيلم أنه يفاجئك مظنش انها فاجئتنى للاسف .

فيلم " لص بغداد " فيلم كانوع ممكن يكون جديد لكنه مش افضل حاجة سائقها ممكن تتقدم فى النوعية دى خالص ، لكن فى نفس الوقت الفيلم لو عاوز تخرج و تضحك شوية و تتفرج على اكشن لذيذ من غير ما تركز فى التفاصيل الى اتكلمت فيها دى ، و غيرها محبتش اتقل على الفيلم أكثر من كده فادخل و استمتع .

تقييمى للفيلم ..... ( 6 / 10 ) .

#KhaledEssamReviews #لص_بغداد