يمكنك الكتابة معنا بالموقع
الكتابة بحرية تامة
سجل حسابك بالموقع الان انه مجاني

بنجامين بتن وفلسفة عقارب الساعه..

2019-04-09 15:00:49 فن و سينما ...






قد يحتوي الريفيو علي حرق للاحداث
وكإني باشوف الفيلم لأول مره ❤
( The Curious Case of Benjamin Button)
الفرص هي التي تحدد هوية حياتنا، حتى تلك التي تفوتنا
Our lives are defined by opportunities , even the ones we miss.. 
لا تعلم أبداً ما هو آتٍ إليك
You never know what's coming for you.
القصة هنا لشخص اتخلي عنه والده يوم ولادته لانه تخيل انه انجب مسخ،  شخص اتولد بعيب خلقي يخليه يبدأ حياته بشيخوخه مبكره وكإنه كهل ف التمانين من عمره ومع مرور الزمن بيبدأ عمره ف الزياده وشكله ف التغير العكسي وكل ما يكبر ف السن يصغر ف الشكل ، وتبدأ تتابع نمو الشخص اللي شكله من بره عجوز "وهو في واقع الأمر طفل لم يختبر بعد من الحياه اي شئ " وبدل ما يمشي يشرح نفسه لكل اللي بيقابلهم بيتعامل مع شيخوخته علي انها حقيقه مش بس واقع ،  وكذلك ف كل مراحله العمريه اللاحقه.. 
الحقيقه شخصية " بين " بتخليك مصدقها ف كل مراحلها العمريه علي اختلافها
شخص اتفرض عليه انه يعيش حياة مش حياته ويتعامل علي اساس شكله اللي ظاهر للناس مش احساسه الداخلي ك بني أدم عمره غير شكله ، والحقيقه ان ايريك روث نجح ف كتابة سيناريو جيد مقتبس من قصة قصيرة بنفس الاسم كتبها فرنسيس سكوت فيتزجيرالد سنة 1922 وقدر يضيف ويغير من احداث القصه حتي تصلح لفيلم سينمائي ..
اما بالنسبه ل مخرج ال83 فيلم ، صاحب الروائع "Se7En" و "Fight Club" و "Panic Room" و "Zodiac" وغيرها "ديفيد فيشر" ف هو قدر يطلع لنا بتحفه فنيه اخري مليئه بالمعاني العميقه والايقاع المتماسك واللي ادي الفيلم طابع اقرب الي الكلاسيكي بالاضاءه الضبابيه و الكادرات الجميله والمونتاج اللي نجح ف فصل القصتين وتلاحمهم ف نفس الوقت بمنتهي السلاسه حتي في اندماج صوت بطل القصه الاصليه وصوت الراوي وقدر يحافظ علي التوازن ما بين القصتين بالاسلوب السردي ده غير الموسيقي العذبه للفرنسي أليكساندر ديسبلا واكيد المؤثرات البصرية والمكياج تحت قيادته طبعاً واللي كانوا عوامل قويه لترشيح الفيلم لاوسكار احسن فيلم واحسن اخراج ..
اما عن دور براد بيت ف هو كفيل اني افضل احبه بسببه طول عمري ❤ واحد من افضل آدائاته علي الاطلاق ف تجسيده للشخصيه وابعادها ، انفعالاته اللي طول الوقت محبوسه وازاي هو قادر يوصّل ده ، تصرفاته ككهل وهو ف الحقيقه طفل،  احساسه بالاختلاف وعدم قدرته عن التعبير عن نفسه،  قدرتة علي انه يوصّل ده بدون اي افتعال او برود ف الآداء طبعاً تُحسب له ،  كيت بلانشيت علي طول عظيمه، وتراجي هينسون كانت راااائعه.. 
الفيلم رؤيه فلسفية لفكرة الزمن وان حتي لو كانت عقارب الساعه بتمشي بالعكس ف النهايه اللي مقدر ليك هايكون،  حتي لو مااتفقتش او اقتنعت بالحقيقه دي ، وحتي لو انت ف ايدك القرار تعمل ايه وماتعملش ايه ، حياتك والاشخاص اللي هاتقابلهم ويأثروا فيك ، المواقف اللي هاتقابلها والناس اللي هاتقع ف غرامهم مش هايتغيروا حتي لو الظروف اتغيرت .
"فيه مشهد عبقري بيأكد الفكره دي لما كان "بتن" بيحكي عن عن حادثة ديزي وان لو كان اي عنصر من عناصر الاحداث اللي سببت الحادثه اتأخر بس 5 دقايق ماكانتش حصلت"
الفيلم مليان Quotes  فلسفيه جداً عن الحب والحياه والعمر والموت،  هايخليك طول الوقت ولمدة 3 ساعات تقريباً عندك حاله من حالات الانفعال العاطفي الشديد جداً الممتزج بالسعاده احياناً والحزن احياناً اخري..
الفيلم كسب 3 جوايز اوسكار افضل مكياج وافضل تصميم انتاج وافضل مؤثرات بصرية واترشح ل 13 جايزه منهم افضل فيلم وافضل ممثل وأفضل ممثلة مساعدة  
الفيلم نوعه درامي خيالي رومانسي إنتاج 2008 
تقييمه علي IMDb 7.8/10 
وتقييمه علي Rotton Tomatoes  72%
الفيلم أخراج ديفيد فينشر و بطولة براد بيت وكيت بلانشيت و تراجي هينسون وچوليا اورموند


وفي النهايه لا يسعني الا اني افكركم ب امنيات بتن ل بنته ❤ واتمناها لكم ولنفسي ☺
“لم يفت الأوان أبداً كي تحققي ما تريدين . فلا حدود للزمن ، يمكنكِ التوقف حينما تشائين . يمكنكِ التغير أو البقاء على حالك ، فلا قوانين تتحكم بذلك . يمكننا الاستفادة منها أو هدرها ، أتمنى لك الاستفادة منها . أتمنى أن تري أشياءً تفاجئك . الشعور بأشياء لم تعرفيها من قبل . وأن تقابلي أشخاصاً بوجهات نظرٍ مختلفة . أن تعيشي حياةً تفخرين بها ، وإن اكتشفت عكس ذلك ، أتمنى أن تمتلكِ القوة للبدء من جديد.”  "بنجمن بتن"

















نحن نقدر تعاونك
من فضلك اختر نوع التجاوز




شاهد ايضا




التعليقات

  • اكتب تعليق




مواضيع جديده



افضل 30 كاتب هذا الاسبوع

اكثر المواضيع مشاهدة علي الاطلاق