يمكنك الكتابة معنا بالموقع
الكتابة بحرية تامة
سجل حسابك بالموقع الان انه مجاني

Cold War وسحر السينما الاوروبيه

2019-04-02 13:02:49 فن و سينما ...






Cold War او ZIMNA WOJNA 
انا في العموم شخص مش ميال قوي للافلام الاوربيه ومابفضّلش اتفرج علي فيلم مش فاهمه لغته الناطق بيها وخصوصاً الافلام اللي بيقولوا عليها افلام مهرجانات ، بس الحقيقه اني غيرت رأيي تماماً بعد ما شوفت الفيلم ده ❤ ..
واحد من اجمل الافلام اللي شوفتها السنه دي في تاني تجاربي لمشاهدة فيلم اوروبي واعتقد انها مش هاتبقي الاخيره.. 
بدايةً كده الفيلم بيبتدي بشكل يشبه شويه الافلام الوثائقيه عن طبيعة الحياه والبيئه الريفيه ف بولندا والحقيقه كمان اني اول مره قررت اني اشوفه قفلته بعد مرور 10 دقايق واتفرجت علي فيلم تاني خالص وحسيت ان الكليشيه بتاع الافلام الاوروبيه ومللها حقيقي ..
بعد كام يوم قررت اني اديله فرصه تانيه خصوصاً اني مولعه بالافلام الجديده اللي بتتصور ابيض واسود واني كمان سمعت وقريت إشادات كتيره جداً عنه والنتيجه كانت اني وقعت ف غرامه ❤
الفيلم بيحكي قصة ڤيكتور العازف الموهوب ومؤلف وموزع الموسيقي اللي بيحاول يعمل فرقه موسيقيه تغني الاغاني الفلكلوريه البولنديه الاصليه و في محاوله منه للعثور علي صوت غنائي للفرقه دي بيلاقي بنت جميله ومختلفه بماضي غامض وشخصيه قويه وبتبقي زولا فعلاً في خلال ايام بطلة الفرقه وبطلة قلبه ..
وفي اطار الحرب البارده واللي انقسم فيها العالم ما بين امريكا وحلفائها والاتحاد السوفييتي واتباعه وتحديداً ف الفتره من اواخر الاربعينات الي اوائل الستينات اللي بتدور فيها احداث الفيلم تحت قيادة ستالين الحاكم الديكتاتور اللي كانت بولندا خاضعه ل سيطرته وقتها وكان بيحاول من خلال التجسس فرض وجوده علي كل مؤسسات الدوله وعلي كل شئ تطوله يده وفي ظل الاحداث السياسيه وبسببها وفي ظل محاولات الامن التجسس علي ڤيكتور عن طريق استجواب زولا بنشوف ابطال الفيلم في اول محاوله ليهم لرفض الواقع المظلم ده والهروب منه ل واقع افضل واكثر حريه واللي للاسف مابتكملش ومن هنا بتبدأ رحلتهم ف التغيير وبتاخدهم الايام والاماكن وبتتطور شخصياتهم ويبعدوا ويقربوا و بيتقابلوا علشان يتفارقوا وكل مره بيتقابلوا بيحبوا بعض اكتر و ف كل مره بيتفارقوا بتبقي الطريقه اكثر قسوه من المرّه اللي قبلها ..
مخرج الفيلم بافل بافيكوفسكي بيحكي انه استلهم قصة الفيلم من قصة حياة والديه زولا و ڤيكتور -واللي اسمائهم الحقيقيه هي اسماء الابطال بالفعل والفيلم مُهدي اليهم -   ، ووصفهم بأنَّهم من أكثر الشخصيات التي قابلها في حياته إثاره وروعه .. وان كلاً منهم كان قوي وعظيم ، ولكن وجودهم مع بعض كان بيمثل " كارثه أزليه "..
مخرج الفيلم اكتسب شهره واسعه عن طريق فيلمه السابق الحاصل علي جايزه اوسكار افضل فيلم اجنبي لعام ٢٠١٥ وهو فيلم "Ida" واللي كان بنفس البطله و كمان بالابيض والاسود واللي واضح جداً ان بافيكوفسكي بيفضلهم ..
الفيلم شاعري لاقصي درجه .. حتي بنهايته الصادمه  في ظل المزيكا والاغاني و رقة وبرائة وآداء "جوانا كوليج" والتيمه الغنائيه اللي بتبقي مصاحبانا طول الفيلم من اوله ولحد آخره بصوتها العذب ونظرات "توماس كوت" الحالمه وتقلباته وهزايمه .. فكرة الابيض والاسود نفسها .. الاضاءه ..  لوكاش زال والكادرات والسينماتوجرافي العظيمه .. تجربه كده يعني حاجه من ورا الخيال الحقيقه ❤
الفيلم اترشح ل 3 جوايز اوسكار احسن فيلم اجنبي واحسن اخراج واحسن تصوير واترشح للسعفه الذهبيه وكسب جايزة الاخراج ف مهرجان كان 
الفيلم بطولة توماس كوت وجوانا كوليج واخراج البولندي بافل بافيكوفسكي وانتاج 2018
الفيلم نوعه دراما/موسيقي/رومانسي
تقييمه علي IMDb 7.7 
وعلي Rotten Tomatoes 92%

















نحن نقدر تعاونك
من فضلك اختر نوع التجاوز




شاهد ايضا




التعليقات

  • اكتب تعليق




مواضيع جديده



افضل 30 كاتب هذا الاسبوع

اكثر المواضيع مشاهدة علي الاطلاق