يمكنك الكتابة معنا بالموقع
الكتابة بحرية تامة
سجل حسابك بالموقع الان انه مجاني

Her عندما تحب كما لم تحب من قبل ..

2019-04-17 01:03:18 فن و سينما ...








يحتوي الريڤيو علي حرق للاحداث
Her ❤
عادةً مابحبش اعمل ريڤيو فيه حرق للاحداث بس الفيلم هنا فيه تصوّر عبقري وفلسفي لتأثير التكنولوچيا ف حياتنا  وازاي ممكن تكون المنقذ و المهلك ف نفس الوقت ف واحد من اقوي و افضل افلام الخيال العلمي ف اخر 20 سنه .. من وجهة نظري طبعاً .. 
واحد من افضل 5 افلام شاهدتهم ف حياتي وتقريباً افضل فيلم خيال علمي بالنسبه لي.. 
الفيلم بيحكي قصة شخص حساس جداً شغلته انه بيكتب خطابات للناس اللي مابتعرفش تعبر عن نفسها بالكلام ف المناسبات العاطفيه .. بطل الفيلم بيعاني من اكتئاب ما بعد الانفصال واللي بسببه بيحاول يدور علي اي حاجه تخرجه من حالة الاكتئاب دي خصوصاً ان زوجته السابقه كانت حب حياته وصديقة عمره ف نفس الوقت ومن هنا بيشاهد اعلان ل نظام ذكاء اصطناعي "Os" معمول مخصوص لحالة شخص مثله بيعاني من الوحده وبيدور علي حاجه تملي وقت فراغه وتشاركه وحدته بطريقه تقابل احياجاته.. ف بيقرر انه يشتريه .. ثيادور بيبدأ تشغيل ال Os وبيطلب منه المبرمج اختيار صوت للنظام رجالي او نسائي .. ولإنه شخص وحيد وشديد الحساسيه و حالم وبيعاني من الاحتياج العاطفي بيختار صوت نسائي وبتبدأ رحلة انفعاله بالصوت تتحول من مجرد ونس لحد ما بتتحول ل هوس او يمكن كما تهيأ له لقصة حب ولإن سامانثا كانت بتحب ثيادور بالطريقه اللي هو كان عايزها ولإن كل واحد فينا امنية حياته ان الشخص اللي بيحبه يحبه بالطريقه اللي هو عايزها ومش ب اي طريقه تانيه بنلاقي نفسنا احنا كمان بنحب سامانثا زي ما اختارت انه يكون اسمها ..
حاجه من اكتر الحاجات اللي خلت ثيادور يتعلّق ب ثامانثا ان صوتها النسائي الدافي الخلّاب كان بينبض بالحياه وده قدر يكوّن مشاعر بينهم ودي من اكثر نقاط الفيلم قوه .. لأن لو كان صوت نظام الذكاء الاصطناعي الكتروني مكانش هايبقي فيه مشاعر ومكانش هايبقي فيه فيلم بالروعه دي .. بس فكرة الصوت الانثوي خلّت ثيادور يحس انه بيحب بني ٱدم .. كائن حي من لحم ودم.. وخلي فيه حميميه وكإنها علاقه طبيعيه بين شخصين واقعين ف الحب ..
صوت سكارليت چوهانسن لوحده كفيل انه يخلي اي كائن حي او مش حي حتي يحبها .. صوت من كتر قوة تأثيره اترشح لجايزة افضل ممثله اكتر من مره ف السنه دي بل وكسبت جايزه افضل ممثله بالفعل من اكاديمية الخيال العلمي الامريكيه رغم عدم ظهورها ف الفيلم ، صوت قادر علي التعبير بكل ذرة احساس فيه .. هي كمان قدرت توصّل فكرة ان نظام الذكاء الاصطناعي ممكن يتطوّر وتتكون له مشاعر ويحس وكإنه بني ٱدم ..
ايمي آدمز ف دور صديقة البطل واللي بتعاني من مشاكل زوجيه وبتلجأ هي كمان لل Os في محاوله منها للتغلب علي مشاعرها السلبيه ووحدتها بعد انفصالها ف أدت الدور بحياديه خصوصاً ان مساحة الدور مكانتش تحتمل اي استعراض هي يادوب أدت الشخصيه زي ما كانت مكتوبه.. 
اما عن واكين فينيكس ف انت لا تملك امامه غير انك تقع ف غرامه ..  تقمّص مش طبيعي للشخصيه وفهم كامل لابعادها..  وكإن خواكين فينيكس هو ثيادور وده مش تمثيل ❤ .. هاتلاقي نفسك تلقائياً لازم هاتكتئب معاه بعد انفصاله عن زوجته ..  لازم تحب معاه سامانثا .. لازم قلبك يتقطع لما بيقع ع الارض وقت ما كان فيه عُطل ف سيستم التشغيل .. ولازم تحس انك عايز تنتحر لما تعرف انها بتحب معاه 641 شخص تاني ..
الالوان ف Her محتاجه ١٠ مقالات علشان توفيها حقها .. من اكتر الحاجات المبهجه اللي شوفتها ف حياتي ف فيلم رغم كون الفيلم مش مبهج بالدرجه علي مستوي القصه بل يمكن يكون العكس .. مافيش كادر مافيهوش باليت الوان مش ف منتهي الروعه .. كل كادر يعتبر لوحه فنيه ف حد ذاتها .. سينماتوجرافي عظيمه كالعاده ل هويت فان هويتما واللي انا من عشاق رؤيته التصويريه اللي دايماً بديعه ومعبره ومختلفه .. الاحمر اللي طول الوقت غالب ف كادرات ثيادور سواء ف ملابسه او اثاث بيته وازاي بيبين قد ايه هو شخص شاعري وحالم وحساس ومشاعره جياشه وعاطفي جداً والكادرات الضبابيه ف المدينه والناس بجانبه علشان نعرف قد ايه هو شخص مختلف ..
المزيكا والاغاني لفرقة اركيد فاير كانت من اكتر عناصر الفيلم تميزاً ومن اكتر العوامل المؤثرة واللي بتساعدك انك تتفاعل مع الاحداث وتمتزج مشاعرك بمشاعر الشخصيات وخصوصاً ثيادور وعلي الرغم من انك تقريباً طول الفيلم مش بتشوف اشخاص كتير بجانبه الا ان المزيكا المصاحبه بتبقي مستحوذه علي حواسك كلها ومش محسساك ب اي وحده او ملل ..
الاخراج كان دقيق جداً تنظيم زوايا التصوير .. المونتاچ .. كادرات ثيادور .. كل حاجه ليها معني.. دلالات الالوان والاضاءه سواء ف مشاهده مع زوجته السابقه او مشاهده وهو لوحده او حتي مشاهده الخارجيه وهو بيكلم سامانثا .. وصولاً ل مشهد النهايه ..
اعظم ما في الفيلم انه بيخلينا نواجه حقيقة ان التكنولوجيا ممكن تكون شيئ مفيد وبيساعدنا - زي ما شوفنا ازاي قدرت سامانثا انها تخلي ثيادور ينظم جهده ومهارته اللي ماكنش حاسس بقيمتها ب اختيارها ل خطاباته الاكثر ملائمه لبعضها ونشرها ف كتاب - و ف نفس الوقت ازاي ممكن تعيشنا ف هاله من الوهم وتكون قاسيه وقاتله و تلغي العلاقات الاجتماعيه واللي بيكمن جوهرها ف فهمنا و تقبلنا ل اختلافاتنا مع انفسنا و فهمنا وتقبلنا ل اختلافاتنا مع الاخرين و ان التكنولوچيا عمرها ما هاتعوض التواصل الانساني او العلاقات الاجتماعيه او تحل محلها .. مشهد النهايه اكبر دليل ..
Her 
واحد من الافلام اللي بعد مشاهدته هاتفكر كتير ف اننا محتاجين نظم ذكاء اصطناعي تخلينا نقابل سامانثا الخاصه بينا .. وبعد اعادة مشاهدته هاتختار انك تغير رأيك مره تانيه ..
الفيلم انتاج سنة 2013 وحصل علي اوسكار افضل سيناريو لهذا العام واترشح لجايزة افضل فيلم 
بطولة واكين فينكس و سكارليت چوهانسن"آداء صوتي" و ايمي آدمز و كتابة واخراج سبايك جونز
الفيلم نوعه  دراما / خيال علمي /رومانسي 
تقييمه علي Imdb 8/10
وتقييمه علي Rotten Tomatoes 94%



















نحن نقدر تعاونك
من فضلك اختر نوع التجاوز




شاهد ايضا




التعليقات

  • اكتب تعليق




مواضيع جديده



افضل 30 كاتب هذا الاسبوع

اكثر المواضيع مشاهدة علي الاطلاق