يمكنك الكتابة معنا بالموقع
الكتابة بحرية تامة
سجل حسابك بالموقع الان انه مجاني

بالروح بالدم نفديك يا شعبولا

2019-04-01 15:19:22 شعر و أدب ...






                           بالروح بالدم
نفديك  يا شعبولا



نص فانتازي .. إهداء إلى مطرب الأحياء الشعبية شعبان عبد الرحيم



نفسى .......



أبقى زعيم للأمة العربية



ملك .. سلطان.. أو حتى رئيس



ما يضرش



ويكون ولاد تورثنى فى الحكم



وحرمة  تعمل  ف عيال الناس



مابدالها 



يعنى تقريهم  فى مدارس



وتقري على أهاليهم 
فى  مدافن



موتى  ..أو أحياء



طبعاً  هـ يكون  لى  سلطان
ونفوذ



وفلوس وتيوس



رؤساء تحرير  للتسبيح
بالحمد



على صفحات الجرانين



وف قلب  الفضائيات
الفاضية



بالتحديد فى الفضائية



اللى اللوجو بتاعها



 فردة جزمة طبعاً  هـ تلم



المشاهير  الطراطير



الشخصيات.. المخصيات



الوطنيين الرطنيين



بالأقلام المنحازة



بالسكاكين الحازة



فى رقاب الخونة  .. أولاد
الكلب



...................



طبعاً  لما أبقى



رئيس



هـ يكون لى دولة وأمن



وأمن الدولة



وجيوش ومواكب



موتوسيكلات



قدامى وورائي



وكروش بتداهن وترائي



لما تهف عليا غزالتى .. وأقص شريط



على ناصية شارع الجرابيع



لازم كل الناس تتهد..



فى بيوتها



لازم كل شوارع  حاضرتي



يوقف حالها



-       
طالب رايح تمتحن الثانوية العامة ؟



-       
 ممنوع



-       
عيان رجلك والقبر ؟



-       
 ما
تموت



-       
استاذ جامعى  رايح تدى محاضرة ؟



-       
وأنا مالى



-       
قاضى رايح تحكم  فى قضية ؟



-       
انت بالذات ممنوع



طبعاً هـ يجينى درويش



بزبيبة ودقن..



 ويقول لى إن الفاروق



كان بينام  تحت النخلة



ومش عارف إيه



راح اقوله : ياخى إيه



 وهسب له مش عارف إيه



ما أنا غول فى السب



وضرب الشلاليت



وقبيح جداً مع أمثالهم



هو انتو صحابة



واللا أنا يعنى صحابى



معلهش فى اللفظ يا شعبى..



سامحونى



ما أنا ريسكم



أنا صاحب  أول ضربة فاس



فى  المشروع القومي



لزراعة سبعين مليون فدان



كوسة وقرع وفاقوس  .. وخيار



والله ما ليكو عليا حلفان



وما ليا خيار



فى المريسة والملك



أنا مرة صحيت  م النوم



وقالولى  اتمريس  واتملك



وعاديكم



.........



مش أنا يا شعبي الحبوب



أول من عدل  فى القوانين



علشان أديكم  حريتكم



- ما تردوا



-  أيوة  ياريس



- وانا يا اخوانا



مش أول من داس تور  على
رجله



وما قالش أي ي ي ي



-       
ولذلك أنا غيرت الدستور



-       
غيرتلكو الدستور يا أخوانا



-       
ما تردوا



-       
( بصوت مكتوم فى الصدر ) :



-       
أيوة يا تور



-       
طيب يا شوية جرابيع



-       
مش باسقيكم بإيديا  الحرية



نقطة بنقطة



قلبى عليكم خايف جداً



جرعة زيادة تعمل فوضى



أو حتى غثيان أو قيء



يللا اتهنوا



سوا واتمنوا



قولوا وغنوا



إدي إدى إدى



إدينا كمان حرية



شكراً شكرأ  شعبي الحر



.........



نفسى ف حاجة وانا  ع الكرسى



نفسى ألم الشمل العربي



عارف صعب



عارف إن ولاد الكلب



مش ممكن يتفقوا  ف رأى



ولذلك............



حفضل فى القصر الموحش



وهـ بص  ف جدرانه وسقفه



واشمشم فى الملل العربى



وأململ فى المش البعري



وأمشمش  فى البعر المللى



وأعرب فى اللمم  المشى



وإييييييييييييييييييييييييييييييه



بس خلاص ...



كتب النص عام  2008



 


















نحن نقدر تعاونك
من فضلك اختر نوع التجاوز




شاهد ايضا




التعليقات

  • اكتب تعليق




مواضيع جديده



افضل 30 كاتب هذا الاسبوع

اكثر المواضيع مشاهدة علي الاطلاق