يمكنك الكتابة معنا بالموقع
الكتابة بحرية تامة
سجل حسابك بالموقع الان انه مجاني

حكايات الغريب فى كارفور

2019-03-12 21:12:46 منوعات ...






فى محل كارفور امسك الرجل المسكين صورة زوجته التى يبحث عنها منذ الصباح الباكر وتاهت وسط الزحام ..ثم اقترب من موظف الامن ...

الزوج : لو سمحت يا باشمهندس ..مشوفتش صاحبة الصورة دى ..دى مراتى واسمها ايناس عبد الهادى ..جينا الصبح نشترى شوية جبنة ومسحوق غسيل وقالتلى خمس دقايق ابص بس على عروض الزيت ..استنى هنا واوعى تمشى عشام منتوهش من بعض ..ومن ساعتها مش لاقيها 

- موظف الامن : ممممم ..ايوة ايوة انا شوفتها من شوية ..من قيمة ربع ساعة كدة ..كانت ناحية الطاسات التيفال ..عمالة تقلب فيهم ..بس هى ماسمهاش ايناس ..دى اسمها عطيات ابراهيم من السويس ..بتعشق الحلل والطاسات التيفال زى عنيها ..اسطورة متحركة ..مكانتش تخاف ابدا ..لا من جوزها ولا من سعر الطاسات التيفال ..ياما عملت اعمال بطولية وخلصت مرتبات وفيزات ..مكانتش تنام وترتاح الا اما تشطب على فلوس جوزها وتخليه عالحديدة ..روح شوفها وسط الستات اللى هناك دول 

يتجه الزوج الى مجموعة من السيدات ..يقلبن فى صمت ملابس حريمى داخلية ..

- لو سمحتى يا حاجة ..ماشوفتيش الست اللى فى الصورة دى ..دى مراتى اسمها ايناس عبد الهادى ومش لاقيها من الصبح ..

-جرى ايه يا راجل انت ..انت جاى تتحمرش بينا ولا ايه ..غور فى داهية احنا ناقصين بلاوى ..جاتكم الهم عالصبح 

سيدة اخرى كانت بجوارها : ماتزعلش يا خويا ..ورينى الصورة كدة يمكن اكون شوفتها ..يااااه ..دى حبيبتشى ايفون بنت عم ملاك .طول عمرنا صحاب واخوات وبنيجى كارفور دايما ..ياما دوبنا طاسات تيفال وحلل ومساحيق غسيل  ومفارش سفرة ..كانت بطلة بجد ..تقعد تلف بالست ساعات ماتتعبش ..تلف تلف ..ماتسيبش حاجة الا اما تقلب فيها ..من الهدوم للخضار ..ومن الكوبايات البلاستيك لقسم الاجهزة الكهربائية اخر مرة شوفتها كانت عند قسم الملابس الحريمى ..هى تقلب فى الهدوم والراجل ياعينى يطبق وراها ..لحد ما الراجل يا حبة عينى ضغطه على ووقع من طوله ...هييييح ..يا حبيبتشى يا ايفون ..كانت تستاهل وسام الشجاعة من الطبقة الاولى ..

- طب ماتعرفيش مشي فى انهى اتجاه ؟

-هى مشيت راحت ناحية المجمدات ..يمكن راحت تجيب بطاطس ولا حاجة ...

-موظف فى كارفور : يا استاذ يا استاذ انت بتدور على مراتك ؟

- ايوة والنبى ..انا بقالى ست ساعات بلف عليها مش لاقيها ..هى اللى فى الصورة دى 

- ايوة انا عارفها دى اشهر زبونة عندنا ..مدام نرمين ..برنسيسة فى نفسها ..كان ليها واقعة مشهورة ..راحت قسم الملابس و دخلت البروفة ..وجوزها فضل مستنيها 3 ايام ورا بعض ..فضل يحرق فى سجاير يحرق فى سجاير ..ولما قلق عليها اقتحم البروفة ..طلعت واحدة تانة كانت بتقيس ..قامت مصوتة ولامة عليه الناس ..مسكوه وعملوله قضية تحرش ..خرج من السجن وفضل ماشى يكلم نفسه ..ومافيش على لسانه غير  جملة واحدة : هى خرجت امتى ؟..دنا كنت واقف قصاد البروفة ماتحركتش ..

تنزل موسيقى اغنية : غنى يا سمسمية ..لكل ست قوية ...


















نحن نقدر تعاونك
من فضلك اختر نوع التجاوز




شاهد ايضا




التعليقات

  • اكتب تعليق




مواضيع جديده



افضل 30 كاتب هذا الاسبوع

اكثر المواضيع مشاهدة علي الاطلاق