كلنا بنحب الكتابة
#اربح_من_الكتابة_بحرية_تامة
سجل حسابك بالموقع الان

السيارات

2019-11-28 14:31:50 تكنولوجيا ...







البوست طويل للاسف 
بس يستحق القراءة لمالكي السيارات 


بالنسبة لحادثة العربية الاسكودا اللي الايرباج بتاعتها فتحت في حادثة بسيطة جدا و فجرت عجلة القيادة و طبعا شظايا معدن كتير جوا الطارة قتلت الدكتور الله يرحمه اللي كان سايق
الموضوع طلع فعلا كبير بس احنا اللي عايشين في واقع مش داري بأخبار مهمة شاغلة دول كتير 
الموضوع بعد بحث طلع ان في شركة يابانية مصنعة للايرباج اسمها  Takata الشركة دي بتصنع ايرباج لاغلب ماركات العربيات  مش بس الاسكودا 
BMW ,  Chrysler,  Dodge,  Jeep ,  Ferrari ,  Ford ,  Honda ,  Lexus ,  Mazda ,  Mercedes-Benz ,  Mitsubishi , Nissan , Toyota , Vw  ,  Subaru ،  Cadillac ,  GMC,  Pontiac  و غيرهم كتير 
شركة Takata دي اكتشفوا عيب صناعة بيظهر بعد 6 سنين من تاريخ الصناعة ، حصل كذا حالة وفاة بنفس الطريقة في عربيات ماركات و موديلات مختلفة حول العالم كانت اولهم حالة وفاة لبنت 19 سنة في عربية هوندا اكورد 
و حصل بعدها كذا حالة حوالي 30 حالة تم تسجيلهم حتي 2016 ( مش متأكد من عدد الحالات ) 


شركات سيارات كتير عملت استدعاء لسيارة لتغيير الايرباج  
الحكومة الاسترالية عملت استدعاء اجباري لمالكي سيارات كتير لتغيير الايرباج و الاولوية للموديلات الاقدم و اعلنوا انهم بنهاية ديسمبر 2020 هيكونوا خلصوا كل استدعاءات السيارات  
بسبب شركة Takata يعتبر حصل اكبر استدعاء لسيارات في تاريخ السيارات عموما 
الاستدعاء المفروض يكون ل اكتر من 40 مليون عربية مختلفة الماركات حول العالم  فيهم 2.5 مليون عربية في استراليا
ده غير سيارات النقل الكبير و الموتوسيكلات و السيارات الرياضية ، اغلب ما تم انتاجه ما بين 1999 و 2017 
مش كل العربيات اللي اتقالت ف البوست فيها عيب الصناعة ده عشان مش كل الموديلات راكب فيها ايرباج من Takata , في قوائم علي الانترنت ب ماركات و موديلات العربيات 
الشركات بدأت تعمل استدعاء بالايميل للملاك  طبعا ده غالبا مش هيمشي مع دولتنا ابدا عشان اغلب الوكلاء ما عندهمش داتا محترمة عن ملاك العربيات غير ان العربيات بتتباع من مالك لمالك و توكيلات و الاغلبية اكيد محدش عارف اي حاجة عن القصة دي و صعب تتبعها في مصر او للاسف مش هيكون محل اهتمام من الاساس 


شركات السيارات عملوا اداة علي مواقعهم  تعرف عن طريقها عربيتك فيها العيب ده ولا لا  بس لسه مش كل الشركات نفذت الاداة علي المواقع 
تعرف عن طريق ال  VIN  
( Vehicle Identification Number ) 
رقم تحقيق هوية السيارة 
ده بيكون عبارة عن 17 رقم ده موجود في ورق العربية او في اسفل الزجاج الامامي ناحية السائق او في اسفل القايم بتاع السائق لما تفتح الباب 
ممكن كمان الكشف عن طريق رقم الشاسيه اللي هو عبارة عن اخر 7 ارقام في ال VIN 
الشركات المصنعة للسيارات اكدت ان اللي عنده العيب ده في سيارته هيتم ابلاغه و تغيير الايرباج مجانا بس في اولوية للموديلات الاقدم اللي هيا اكثر خطورة و للسيارات الموجودة في دول فيها حراره و رطوبة عالية و عدي علي تاريخ انتاجها 6 سنين 
تغيير الايرباج هيكون بدون تكلفة لمالكي السيارات بس طبقا للاولويات الموضوعة من الشركات الام 
- مفيش خطورة علي اي عربية فيها العيب ده و لسه معداش علي موديلها 6 سنين بس هيكون فيه خطورة في المستقبل 
- الخطورة علي عربيات موديليها عدي من 6 الي 9 سنين في الاماكن الاكثر حراره و رطوبة
- الخطورة علي عربيات موديلها عدي من 6 الي 20 سنة في الاماكن الاكثر برودة 
تعريف العيب بأختصار 
ان الايرباج تم تصنيعه بدون مادة جافة تحفظه في حالته الاولية عشان كده بعد فترة ال 6 سنين من تاريخ التصنيع ممكن تصادم بسيط في ظل وجود حراره و رطوبة عالية يؤدي ل تمزق الايرباج بقوة مضاعفة عن الطبيعي و ده بيسبب ان الشظايا الموجودة داخل الطارة او ناحية الراكب الامامي تسبب اصابات خطيرة او حالات موت نتيجة ذبح عن طريق الشظايا 


الموضوع مخيف و يستحق الاهتمام مش كلام فاضي و الشركات الكبيرة و الدول الكبري بتدفع ملايين فقط من اجل الاستدعاءات 
لازم نكون اكثر دراية و كل جروبات السيارات تبدأ ترتب ازاي يتأكدوا من العيب في العربيات اللي في مصر و التواصل مع الشركات الام و التوكيل الرسمي عشان تسمح بتغيير الايرباج لاي عربية فيها العيب او تم استدعائها في دولة تانية
ربنا يرحم الدكتور اللي اتوفي و يصبر اهله 
نتمني الحادث ما يتكررش في مصر تاني 
اسعي بنفسك للتأكد من سلامة سيارتك عشان ولا دولتك ولا وكيل سيارتك هيعطوا الاهتمام الزيادة المطلوب للموضوع الا عن طريق ضغط من جميع الملاك و بالتواصل مع التوكيلات الرسمية و الشركات الام 
مرفق صورة الحادث 
ممكن تعمل بحث علي نوع عربيتك مع : 
 Takata Airbags Recall 
ممكن تعمل بحث عن 
Which Cars affected by Takata Airbags ! 
Which cars are under recall ! 


ربنا يستر علي الجميع
شير يمكن حد يهتم و ينقذ ناس تانية
اي جديد هيتم اضافته علي صورة تعديل لنفس البوست
تعديل 1 
واضح من تعليقات ناس كتير ان توكيل هوندا و تويوتا مصر بالفعل عملوا اعلان في الجرنال من فترة اكتر من سنة و غيروا بالفعل ايرباجات لناس عندها العيب ده ،  طبعا يستحقوا كل الاحترام بس مطلوب منهم تنويه بصورة اكبر في الميديا  عشان في ملاك كتير مايعرفوش حاجة عن الموضوع 
نتمني نسمع عن باقي التوكيلات 
تعديل 2 
- تم اضافة صورة لكيفية معرفة ال VIN في سيارتك
- ده لينك لمعرفة سيارتك في حالة استدعاء ام لا ! عن طريق ادخال ال VIN 
التويوتا Toyota 
https://www.toyota.com.eg/ar/mytoyota/recall-checker
الاسكودا Skoda
http://master.skoda-auto.com/mini-apps/recall-actions
الفولكس فاجن  VW
http://www.vw.com/owners-recalls/
ده لينك في قائمة بأغلبية السيارات اللي فيها عيب الايرباج 
https://www.nhtsa.gov/equipment/takata-recall-spotlight#faq-35186
تعديل 3 
في بعض ملاك تويوتا تأكدوا ان سياراتهم تخضع لحالة استدعاء و التوكيل طلب منهم الاتصال بيه لحجز موعد صيانة 
شيييير اكتر خلي غيرك يستفيد 👍















نحن نقدر تعاونك
من فضلك اختر نوع التجاوز




شاهد ايضا




التعليقات

  • اكتب تعليق




مواضيع جديده




افضل 30 كاتب هذا الاسبوع

اكثر المواضيع مشاهدة علي الاطلاق